ສໍາມະນາການສໍາຫຼວດ ແລະ ສຶກສາຄວາມພ້ອມ ໃນການພັດທະນາລະບົບຢັ້ງຢືນຕົວຕົນດິຈິຕອນ ຢູ່ ສປປ ລາວ ------------------------------------------------- ໃນອາທິດຜ່ານມານີ້, ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ (ກຕສ) ແລະ ບໍລິສັດ Ryobi Lao ໄດ້ຮ່ວມກັນຈັດກອງປະຊຸມສໍາມະນາ ການສໍາຫຼວດ ແລະ ສຶກສາຄວາມພ້ອມໃນການພັດທະນາລະບົບຢັ້ງຢືນຕົວຕົນດິຈິຕອນ (Digital ID) ຢູ່ ສປປ ລາວ ໂດຍການເປັນປະທານຂອງທ່ານ ນາງ ວັນນະພາ ພົມມະທັນສີ, ຮອງຫົວໜ້າສູນບໍລິຫານລັດ ດິຈິຕອນ, ຊຶ່ງມີຜູ້ຕາງໜ້າຈາກບັນດາກະຊວງ/ທຽບເທົ່າ ແລະ ບັນດາກົມອ້ອມຂ້າງ ກຕສ ເຂົ້າຮ່ວມທັງໝົດ ຈຳນວນ 30 ກວ່າທ່ານ. : ຈຸດປະສົງຂອງກອງປະຊຸມແມ່ນເພື່ອສ້າງຄວາມເຂົ້າໃຈໃຫ້ກັບບັນດາກະຊວງໃນການເກັບກຳຂໍ້ມູນຕ່າງໆ ທີ່ກ່ຽວຂ້ອງກັບການບໍລິການຂອງບັນດາກະຊວງ ເພື່ອນຳເອົາຂໍ້ມູນມາສຶກສາ, ປະເມີນ ແລະ ສ້າງບົດລາຍງານການປະເມີນຄວາມພ້ອມ (ໂດຍສະເພາະຄວາມພ້ອມທາງດ້ານ ນິຕິກໍາ, ລະບົບເຕັກນິກ, ມາດຕະຖານ ແລະ ບຸກຄະລາກອນ) ຂອງແຕ່ລະຂະແໜງການໃນການພັດທະນາລະບົບ Digital ID ຢູ່ ສປປ ລາວ ໃນອະນາຄົດ. : ກອງປະຊຸມຄັ້ງນີ້ ຖືເປັນກອງປະຊຸມໜຶ່ງທີ່ມີຄວາມໝາຍຄວາມສຳຄັນໃນການຊຸກຍູ້ການຫັນເປັນດິຈິຕອນ ຂອງ ສປປ ລາວ ແລະ ທັງເປັນການຈັດຕັ້ງຜັນຂະຫຍາຍຍຸດທະສາດໃນການຫັນເປັນດິຈິຕອນ ກໍຄືວິໄສທັດການພັດທະນາເສດຖະກິດດິຈິຕອນ ແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດ ດິຈິຕອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາ ເສດຖະກິດດິຈິຕອນ ແຫ່ງຊາດ ໄລຍະ 5 ປີ (2021-2025) ແນໃສ່ເພື່ອການກ້າວເຂົ້າສູ່ການຫັນເປັນລັດຖະບານດິຈິຕອນ, ສັງຄົມດິຈິຕອນ ແລະ ເສດຖະກິດດິຈິຕອນ ຂອງ ສປປ ລາວ. : ການຈັດຕັ້ງປະຕິບັດແຜນງານດັ່ງກ່າວນີ້ ແມ່ນການຮ່ວມມືລະຫວ່າງ ກະຊວງ ເຕັກໂນໂລຊີ ແລະ ການສື່ສານ ສປປ ລາວ ແລະ ກະຊວງ ພາຍໃນ ແລະ ການສື່ສານ ຂອງປະເທດຍີ່ປຸ່ນ ໃນການດຳເນີນການສຶກສາ ແຜນພັດທະນາລະບົບ Digital ID ຢູ່ ສປປ ລາວ ໂດຍຜ່ານການປະຕິບັດຕົວຈິງຂອງ ບໍລິສັດ Ryobi Lao, ບໍລິສັດ Ryobi System ຍິປຸ່ນ ແລະ ບໍລິສັດ ເຕັກໂນໂລຊີ ຂອງປະເທດ ຍິປຸ່ນ ຈຳນວນໜຶ່ງ. ---------------------------------- ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ຫ້ອງການ ກຕສ ຈັດພິທີມອບ-ຮັບ ໃບຍ້ອງຍໍປະຈໍາປີ ແລະ ເຜີຍແຜ່ເຊື່ອມຊຶມເອກະສານສໍາຄັນຂອງພັກ ------------------------------ ຫ້ອງການ ກະຊວງເຕັກໂນໂລຊີ ແລະ ການສື່ສານ ໄດ້ຈັດພິທີມອບ-ຮັບ ໃບຍ້ອງຍໍຜົນງານປະຈຳປີ 2022 ໃຫ້ແກ່ພະນັກງານລັດຖະກອນພາຍໃນຫ້ອງການ ແລະ ເຜີຍແຜ່ເຊື່ອມຊຶມ, ຜັນຂະຫຍາຍຜົນສຳເລັດ ຂອງກອງປະຊຸມຄົບຄະນະກາງສະໄໝ ຂອງ ຄະນະບໍລິຫານງານສູນກາງພັກ ສະໄໝທີ XI ຂຶ້ນໃນຕອນເຊົ້າຂອງວັນທີ 04 ຕຸລາ 2023, ທີ່ຫ້ອງປະຊຸມໃຫຍ່ ຊັ້ນ 05 ຂອງກະຊວງ (ເຂດສີສະເກດ), ໂດຍການເປັນປະທານຂອງ ທ່ານ ພູຂົງ ຈິດຮູບໂລກ ຄະນະປະຈໍາພັກກະຊວງ, ຫົວໜ້າຫ້ອງການ ກະຊວງເຕັກໂນໂລຊີ ແລະ ການສື່ສານ, ຊຶ່ງມີຄະນະຫ້ອງການ, ຄະນະພະແນກ ພ້ອມດ້ວຍວິຊາການເຂົ້າຮ່ວມຢ່າງພ້ອມພຽງ. . . ຈຸດປະສົງຂອງການຈັດພິທີໃນຄັ້ງນີ້ ກໍເພື່ອເປັນການຍ້ອງຍໍສັນລະເສີນຜູ້ທີ່ມີຜົນງານດີເດັ່ນ ໃນປະຕິບັດໜ້າທີ່ວຽກງານ ປະຈໍາປີ 2022 ຊຶ່ງໃນນັ້ນ ຜົນການປະເມີນຜູ້ທີ່ໄດ້ຮັບໃບຍ້ອງຍໍປະເພດດີຫຼາຍ: ມີຈໍານວນ 63 ທ່ານ, ປະເພດດີ: ມີຈໍານວນ 12 ທ່ານ, ປະເພດກາງ: 01 ທ່ານ ແລະ ບໍ່ໄດ້ຮັບການປະເມີນຈໍານວນ 12 ທ່ານ (ເຫດຜົນ: ສຶກສາຕໍ່ ແລະ ປະຈໍາການຍັງບໍ່ຄົບວາລະການປະເມີນ). . . ໃນພິທີດັ່ງກ່າວ, ທ່ານ ປະທານກອງປະຊຸມ ຍັງໄດ້ໃຫ້ກຽດເຜີຍແຜ່ເອກະສານສໍາຄັນຫຼາຍສະບັບ ເປັນຕົ້ນແມ່ນ: ຄຳສັ່ງແນະນຳວ່າ ດ້ວຍຜົນສຳເລັດ ຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI; ມະຕິກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI, ລົງວັນທີ 18 ກັນຍາ 2023; ຕີລາຄາການຈັດຕັ້ງປະຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ໃນໄລຍະຜ່ານມາ ລວມທັງບົດລາຍງານການຈັດຕັ້ງປະຕິບັດກາງສະໄໝ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025) ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ທີດທາງແຜນການທ້າຍສະໄໝ ຮອດປີ 2025; ຜົນສຳຫຼວດການນຳພາລວມ ແລະ ແຜນການດຳເນີນງານ ເພື່ອຜັນຂະຫຍາຍມະຕິວ່າດ້ວຍ ສືບຕໍ່ຍູ້ແຮງຜັນຂະຫຍາຍແນວທາງການປ່ຽນແປງໃໝ່ສູ່ລວງເລິກ, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການນຳພາຂອງພັກ ສະບັບເລກທີ 432/ຄລສພ ລົງວັນທີ 18 ກັນຍາ 2023. ຂຽນຂ່າວ: ພຸດດາວອນ ພາສຸວັນ ---------------------------------- ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ກຈພ ຈັດກອງປະຊຸມເຜີຍແຜ່ ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ ແລະ ຍ້ອງຍໍພະນັກງານປະຈຳປີ 2022 ------------------------------------------------ ທ້າຍອາທິດຜ່ານມານີ້, ທີ່ຫ້ອງປະຊຸມຊັ້ນ 5 (ເຂດສີສະເກດ), ກະຊວງເຕັກໂນໂລຊີ ແລະ ການສື່ສານ (ກຕສ), ກົມຈັດຈັ້ງ ແລະ ພະນັກງານ ໄດ້ຈັດກອງປະຊຸມເຜີຍແຜ່ເອກະສານຄຳສັ່ງຂອງຄະນະເລຂາທິການສູນກາງພັກ ແລະ ຄຳແນະນຳຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ໂດຍໃຫ້ກຽດເຂົ້າຮ່ວມເປັນທານຂອງ ສະຫາຍ ຄຳພູ ດວງຖະໜອມ ຄະນະປະຈຳພັກກະຊວງ, ເລຂາໜ່ວຍພັກ, ຫົວໜ້າກົມຈັດຕັ້ງ ແລະ ພະນັກງານ ມີຄະນະກົມ, ຄະນະພະແນກ, ສະມາຊິກພັກ ແລະ ພະນັກງານທັງໝົດພາຍໃນກົມເຂົ້າຮ່ວມ. : ກອງປະຊຸມຄັ້ງນີ້, ໄດ້ຮັບຟັງການເຜີຍແຜ່ເອກະສານທັງໝົດ 4 ສະບັບຄື: ເຜີຍແຜ່ຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ. ສະບັບເລກທີ 411/ຄລສພ, ລົງວັນທີ 08 ສິງຫາ 2023; ເຜີຍແຜ່ຄຳແນະນຳ ຂອງຄະນະຈັດຕັ້ງສູນກາງພັກກ່ຽວກັບການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ. ສະບັບເລກທີ 211/ຄຈສພ, ລົງວັນທີ 16 ສິງຫາ 2023 ແນໃສ່ເພື່ອເປັນການປັບປຸງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຮັບປະກັນ ການກໍ່ສ້າງພັກຕາມ 5 ຫຼັກການ ແລະ 3 ທິດນຳຂອງພັກ, ຖືກຕ້ອງຕາມກົດລະບຽບພັກ; ເຜີຍແຜ່ຄຳສັ່ງວ່າດ້ວຍການເພີ່ມທະວີແກ້ໄຂບັນຫາເຄັ່ງຮ້ອນ ຂອງເສດຖະກິດການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 13/ນຍ. ລົງວັນທີ 29 ສິງຫາ 2023 ແລະ ເຜີຍແຜ່ແຈ້ງການຂອງຫ້ອງການ ກຕສ ເລກທີ 2343/ຫກ.6, ລົງວັນທີ 15 ກັນຍາ 2023.

ທ່ານພູທອງ ພົນວິໄຊ ຮອງປະທານ ສະພາການຄ້າແຂວງຫົວພັນ ໄປເຂົ້າຮ່ວມງານຖະແຫຼງເປີດໂຕ "ໂຄງການສຶກສາ ແລະ ພັດທະນາຍຸດທະສາດຄວາມຮ່ວມມື ລະບຽງເສດຖະກິດ ຈີນ-ລາວ-ໄທ; ລະບຽງເສດຖະກິດພິເສດພາກຕາເວັນອອກສ່ຽງເໜືອ - The Studies and Development of China -Laos - Thailand Economic Corridor Strategic: Northeastern Economic Corridor: NeEC Research Project” ທີ່ແຂວງຂອນແກ່ນ ປະເທດໄທ, ເຊິ່ງຈັດໂດຍ ໂຮງຮຽນມະຫາວິທະຍາໄລຂອນແກ່ນ. ເຊິ່ງມີຫົວຂໍ້ທີ່ສຳຄັນ ແລະ ໜ້າສົນໃຈຫຼາຍຫົວຂໍ້ທີ່ຈະເປັນຜົນດີ ແລະ ເປັນໂອກາດອັນດີໃຫ້ກັບນັກທຸລະກິດທັງສາມຝ່າຍ ໂດຍສະເພາະແມ່ນ SME ພວກເຮົາ.

ທ່ານ ສົມໄຊ ຈັນທະລັງສີ, ຮອງປະທານສະພາການຄ້າ ແລະ ອຸດສາຫະກຳແຂວງຫົວພັນ, ປະທານ ສທໜ ແຂວງ ໄດ້ເຂົ້າເຂົ້າຮ່ວມກອງປະຊຸມແລກປ່ຽນການຈັດຕັ້ງປະຕິບັດວຽກງານ ການຜະລິດອາຫານ ແລະ ເຄື່ອງດື່ມໃຫ້ມີຄວາມສະອາດ, ໄດ້ມາດຕະຖານ (Food safety) ເຊິ່ງເປັນວຽກງານທີ່ສຳຄັນທີ່ບັນດາຜູ້ປະກອບການຈະຕ້ອງຮູ້, ຝຶກຝົນ ແລະ ຈັດຕັ້ງປະຕິບັດ ແລະ ກ້າວໄປສູ່ການຢັ້ງຢືນທາງດ້ານ ອຢ, GMP, GHP, HACCP...ທັງນີ້ກໍ່ເພື່ອຄວາມຍືນຍົງ, ຄວາມເຊື່ອຫມັ້ນຕໍ່ຜູ້ບໍລິໂພກ ທັງພາຍໃນແລະສາກົນ. ກອງປະຊຸມແລກປ່ຽນໃນຄັ້ງນີ້ໄດ້ຈັດຂື້ນໂດຍ ສະຖາບັນພັດທະນາເສດຖະກິດລຸ່ມແມ່ນ້ຳຂອງ(Mekong Institute-MI) ແລະ ກົມອາຫານແລະຢາ ກະຊວງ ສາທາລະນະສຸກ ຂອງລາວ. ມີຜູ້ເຂົ້າຮ່ວມແລກປ່ຽນຈາກພາກເອກະຊົນ, ພາກລັດ ແລະ ສື່ມວນຊົນ

ລົງນາມການຮ່ວມມືຫັນເປັນດິຈິຕອນ ຂອງວຽກງານບໍລິການຈັດຫາງານ -----------------------------------* ເພື່ອຜັນຂະຫຍາຍການຈັດຕັ້ງປະຕິບັດ ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນແຫ່ງຊາດ ໃຫ້ເປັນຮູບປະທໍາ ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ມີການຈັດກອງປະຊຸມການນໍາລະດັບສູງ ໃນງານສັບປະດາດິຈິຕ໋ອນ (Digital Week) ໃນທ້າຍປີ 2022 ຜ່ານມາ ໂດຍມີບັນດາລັດຖະມົນຕີ, ຮອງລັດຖະມົນຕີ ຂອງບັນດາກະຊວງຕ່າງໆເຂົ້າຮ່ວມ ເພື່ອທໍາຄວາມເຂົ້າໃຈ ແລະ ປຶກສາຫາລື ກ່ຽວກັບການຈັດຕັ້ງຜັນຂະຫຍາຍ ວິໄສທັດ, ຍຸດທະສາດ ແລະ ແຜນພັດທະນາເສດຖະກິດດິຈິຕອນແຫ່ງຊາດ ແນໃສ່ຊຸກຍູ້ສົ່ງເສີມວຽກງານການຫັນເປັນດິຈິຕອນ ຂອງ ສປປ ລາວ ໄປຕາມ 3 ເສົາຄໍ້າຍຸດທະສາດການພັດທະນາດິຈິຕອນ ຄື: ລັດຖະບານດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນ. ໂດຍອີງໃສ່ຜົນຂອງກອງປະຊຸມໃນຄັ້ງນັ້ນ, ກົມເຕັກໂນໂລຊີດິຈິຕອນ ຈຶ່ງໄດ້ສືບຕໍ່ລົງຊຸກຍູ້ການຫັນເປັນດິຈິຕອນຂອງບັນດາຂະແໜງການ ຊຶ່ງໄດ້ມີການຈັດກອງປະຊຸມປືກສາຫາລື ຮ່ວມກັບ ກົມການຈັດຫາງານ ຂອງກະຊວງແຮງງານ ແລະ ສະຫວັດດີການສັງຄົມ ເພື່ອຄົ້ນຄວ້າຄວາມເປັນໄປໄດ້ໃນການຮ່ວມມືກັນຫັນວຽກແຮງງານ ແລະ ສະຫວັດດີການສັງຄົມເປັນທັນສະໄໝ ກໍຄືວຽກການບໍລິການຈັດຫາງານຢູ່ ສປປ ລາວ. : ໃນວັນທີ 01 ກັນຍາ 2023 ຜ່ານມານີ້, ທີ່ຫ້ອງປະຊຸມ ກະຊວງເຕັກໂນໂລຊີ ແລະ ການສື່ສານ (ເຂດ ສນຍ) ຈຶ່ງໄດ້ມີພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືຫັນເປັນດິຈິຕອນ ຂອງວຽກງານບໍລິການຈັດຫາງານ ລະຫວ່າງ ກົມເຕັກໂນໂລຊີດິຈິຕອນ, ກະຊວງເຕັກໂນໂລຊີ ແລະ ການສື່ສານ ຮ່ວມກັບ ກົມການຈັດຫາງານ, ກະຊວງແຮງງານ ແລະ ສະຫວັດດີການສັງຄົມ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ລັດຖະມົນຕີ ກຕສ ແລະ ທ່ານ ນາງ ໃບຄໍາ ຂັດຕິຍະ, ກໍາມະການສູນກາງພັກ, ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ມີບັນດາທ່ານຮອງລັດຖະມົນຕີ ກຕສ ແລະ ກະຊວງແຮງງານ ແລະ ສະຫວັດດີການສັງຄົມ, ບັນດາທ່ານຫົວໜ້າກົມ, ຮອງຫົວໜ້າກົມທັງສອງຝ່າຍ ພ້ອມດ້ວຍບັນດາທ່ານຜູ້ຕາງໜ້າຈາກພາກສ່ວນຕ່າງໆ.ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ກອງປະຊຸມປຶກສາຫາລືກ່ຽວກັບການພັດທະນາ ແລະ ຊຸກຍູ້-ສົ່ງເສີມການນຳໃຊ້ ລະບົບການຮຽນອອນລາຍແບບເປີດກວ້າງ (L-MOOCs) ----------------------------------------- ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມປຶກສາຫາລືກ່ຽວກັບການພັດທະນາ ແລະ ຊຸກຍູ້-ສົ່ງເສີມການນຳໃຊ້ ລະບົບການຮຽນອອນລາຍແບບເປີດກວ້າງ (L-MOOCs), ໃນຕອນບ່າຍຂອງວັນທີ 15 ສິງຫາ 2023 ຜ່ານມາ, ທີ່ຫ້ອງປະຊຸມຊັ້ນ 02 ຂອງກະຊວງ (ເຂດ ສນຍ), ໂດຍການເປັນປະທານຂອງ ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ພ້ອມດ້ວຍຄະນະສູນບໍລິຫານລັດດິຈິຕອນ, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ບໍລິສັດສະຕາໂທລະຄົມ (Unitel) ເຂົ້າຮ່ວມ ທັງໝົດຈຳນວນ 10 ກວ່າທ່ານ. : ກອງປະຊຸມໄດ້ປຶກສາຫາລືກ່ຽວກັບການພັດທະນາ ແລະ ຊຸກຍູ້-ສົ່ງເສີມການນຳໃຊ້ລະບົບຮຽນອອນລາຍແບບເປີດກວ້າງ (LMOOCs) ຊຶ່ງເປັນລະບົບທີ່ພັດທະນາຮ່ວມກັນ ລະຫວ່າງ ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ ໂດຍໄດ້ມີພິທີມອບຮັບຢ່າງເປັນທາງການໃນຄັ້ງວັນທີ 11 ມັງກອນ 2023 ທີ່ສູນອິນເຕີເນັດແຫ່ງຊາດ. ສູນບໍລິຫານລັດດິຈິຕອນ, ກຕສ ສປປ ລາວ ໄດ້ຮ່ວມກັບ ກົມຫັນເປັນດິຈິຕອນແຫ່ງຊາດ, ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ, ບໍລິສັດ ສະຕາໂທລະຄົມ (Unitel) ແລະ ບໍລິສັດໂທລະຄົມມະນາຄົມ ໂມບິໂຟນ (Mobifone) ສສ.ຫວຽດນາມ ໄດ້ສຳເລັດການຕິດຕັ້ງ ແລະ ໂອນຍ້າຍຂໍ້ມູນລະບົບການຮຽນອອນລາຍແບບເປີດກວ້າງ (L-MOOCs - Massive Open Online Courses) ມາໄວ້ຢູ່ຄຣາວຂອງ Unitel. ຈາກນັ້ນ, ກໍໄດ້ແຕ່ງຕັ້ງຄະນະຮັບຜິດຊອບ ໃນການພັດທະນາ ແລະ ຄຸ້ມຄອງລະບົບການຮຽນອອນລາຍແບບເປີດກວ້າງຂຶ້ນ, ພ້ອມກັບແບ່ງຄວາມຮັບຜິດຊອບພາຍໃນຄະນະຢ່າງຈະແຈ້ງ ໃນການຄຸ້ມຄອງ, ຊຶ່ປັດຈຸບັນ ເນື້ອໃນຂອງຫຼັກສູດປະກອບມີ 3 ໝວດວິຊາ ຄື: 1) ຫຼັກສູດການຫັນເປັນດິຈິຕອນ ເໝາະສຳລັບ ພະນັກງານຈາກຂະແໜງການ ແລະ ບັນດາວິສາຫະກິດ; 2) ຫຼັກສູດວິຊາສະເພາະ ເໝາະສໍາລັບຜູ້ບັນດາອົງການຈັດຕັ້ງສະເພາະ ຊຶ່ງມີເນື້ອໃນລົງເລິກ ຕາມຂົງເຂດທີ່ແຕກຕ່າງກັນ ເຊັ່ນ: ເສດຖະກິດ, ການສຶກສາ, ກະສິກໍາ, ສາທາລະນະສຸກ, ອື່ນໆ; ແລະ 3) ຫຼັກສູດກ່ຽວກັບທັກສະທົ່ວໄປ ເໝາະສໍາລັບປະຊາຊົນທຸກຄົນ ສາມາດເຂົ້າເຖິງເພື່ອຍົກສູງທັກສະຂອງຕົນ ເຊັ່ນ: ທັກສະທາງສັງຄົມ, ທຸລະກິດ, ການຄຸ້ມຄອງການເງິນ ແລະ ອື່ນໆ.

ລັດຖະມົນຕີ ກຕສ ຕ້ອນຮັບເຂົ້າຢ້ຽມຂໍ່ານັບຂອງ ເອກອັກຄະລັດຖະທູດ ສ. ອາເມລິກາ ປະຈໍາ ສປປ ລາວ --------------------------------------------------- ໃນຕອນບ່າຍຂອງວັນທີ 22 ສິງຫາ 2023 ນີ້, ທີ່ຫ້ອງຮັບແຂກ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ບັນດິດ ສຈ. ບໍ່ວຽງຄໍາ ວົງດາລາ ລັດຖະມົນຕີ ກຕສ ໄດ້ໃຫ້ກຽດຕ້ອນຮັບ ທ່ານ ປີເຕີ ເອັມເຮມ໋ອນ (Dr. Peter M. Haymond) ເອກອັກຄະລັດຖະທູດ ແຫ່ງສະຫະລັດອາເມຣິກາ ຜູ້ມີອໍານາດເຕັມ ປະຈໍາ ສປປ ລາວ ເຂົ້າຢ້ຽມຂໍ່ານັບອໍາລາໜ້າທີ່ ໃນໂອກາດທີ່ໄດ້ສໍາເລັດການປະຕິບັດໜ້າທີ່ທາງການທູດ ໃນ ສປປ ລາວ. : ໂອກາດດັ່ງກ່າວ, ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີ ທີ່ໄດ້ສະຫຼະເວລາ ອັນມີຄ່າ ຕ້ອນຮັບການເຂົ້າຢ້ຽມຂໍ່ານັບໃນຄັ້ງນີ້ຢ່າງອົບອຸ່ນ ແລະ ເປັນກັນເອງ. ພ້ອມນັ້ນ, ທ່ານຍັງໄດ້ລາຍງານໃຫ້ຊາບຂອບການຮ່ວມມືໃນລະຍະຜ່ານມາ ເປັນຕົ້ນແມ່ນ ຂອບຮ່ວມມືອາຊຽນ ແລະ ສອງຝ່າຍ: ສະພາທຸລະກິດອາເມຣິກາ-ອາຊຽນ ໄດ້ເຂົ້າພົບປະ, ປຶກສາຫາລື ຮ່ວມກັບຄະນະນໍາຂອງ ກຕສ ໂດຍແລກປ່ຽນທັດສະນະກ່ຽວກັບການສົ່ງເສີມການນໍາໃຊ້ເຄື່ອງມືດິຈິຕອນ ໃນໄລຍະການແຜ່ລະບາດຂອງພະຍາດໂຄວິດ-19 ແລະ ໃນໂອກາດ ທີ່ຄະນະນໍາ ກຕສ ເດີນທາງໄປເຂົ້າຮ່ວມກອງປະຊຸມລັດຖະມົນຕີອາຊຽນ ຄັ້ງທີ 3 ທີ່ປະເທດຟິລິປິນ ໃນຕົ້ນເດືອນກຸມພາ 2023 ຜ່ານມານີ້, ກໍໄດ້ມີການພົບປະສອງຝ່າຍລະຫວ່າງ ສປປ ລາວ ແລະ ສ. ອາເມຣິກາ ເພື່ອປຶກສາຫາລືແລກປ່ຽນກ່ຽວກັບຍຸດທະສາດ ແລະ ນະໂຍບາຍການພັດທະນາເສດຖະກິດດິຈິຕອນຂອງ ສປປ ລາວ, ບັນດານິຕິກໍາຕ່າງໆ ໂດຍສະເພາະແມ່ນ 14 ແຜນງານ ທີ່ນອນໃນແຜນພັດທະນາເສດຖະກິດດິຈິຕອນແຫ່ງຊາດ ໄລຍະ 05 ປີ (2021-2025). ນອກນີ້, ສປປ ລາວ ກໍຄື ກຕສ ຍັງໄດ້ຮັບການສະໜັບສະໜູນທຶນຝຶກອົບຮົມໄລຍະສັ້ນຫຼາຍຫົວຂໍ້ ເປັນຕົ້ນແມ່ນ: ຂົງເຂດວຽກງານໄອຊີທີ ແລະ ດ້ານຄວາມປອດໄພທາງໄຊເບີ. ພ້ອມດຽວກັນນີ້, ກໍໄດ້ປຶກສາຫາລືຂອບຂອງການຮ່ວມມືໃນຕໍ່ໜ້າ ເຊັ່ນ: ວຽກງານການພັດທະນາການນໍາໃຊ້ເຕັກໂນໂລຊີດິຈິຕອນທີ່ທັນສະໄໝ, ດ້ານການພັດທະນາຄວາມປອດໄພທາງໄຊເບີ ແລະ ການພັດທະນາບຸກຄະລາກອນ ໃຫ້ມີຄວາມຮູ້, ຄວາມສາມາດໃນການນໍາໃຊ້ເຄື່ອງມື ໄອຊີທີ ທີ່ທັນສະໄໝ ເຂົ້າໃນການປ້ອງກັນສື່ອອນລາຍ ຫຼື ການສໍ້ໂກງທາງອອນລາຍ ເພື່ອຫຼີກລ່ຽງຜົນກະທົບ, ບັນຫາ ແລະ ຄວາມທ້າທ້າຍທີ່ຈະເກີດຂຶ້ນໃນປັດຈຸບັນ.

ທາບທາມຄຳເຫັນໃສ່ຮ່າງດຳລັດວ່າດ້ວຍເຂດເຕັກໂນໂລຊີລະດັບສູງ -------------------------------------------- ໃນວັນທີ 25 ສິງຫາ 2023 , ທີ່ຫ້ອງປະຊຸມໃຫຍ່ຊັ້ນ 05 ກະຊວງເຕັກໂນໂລຊີ ແລະ ການສື່ສານ (ເຂດສີສະເກດ), ກົມເຕັກໂນໂລຊີ ແລະ ນະວັດຕະກຳ ໄດ້ຈັດກອງປະຊຸມທາບທາມຄຳເຫັນໃສ່ ຮ່າງດຳລັດວ່າດ້ວຍເຂດເຕັກໂນໂລຊີລະດັບສູງ ໂດຍພາຍໃຕ້ການເປັນປະທານຂອງທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຕາງໜ້າຫ້ອງການ, ກົມ, ສະຖາບັນ, ສູນ ພາຍໃນກະຊວງ ແລະ ບັນດາກະຊວງອ້ອມຂ້າງ, ມີບັນດາຫົວໜ່ວຍທຸລະກິດ ແລະ ພະແນກ ວິທະຍາສາດ ແລະ ເຕັກໂນໂລຊີ ແຂວງ ຜ່ານລະບົບກອງປະຊຸມທາງໄກ. : ຈຸດປະສົງໃນການທາບທາມຄຳເຫັນຄັ້ງນີ້ ກໍເພື່ອແນໃສ່ການປະກອບຄຳເຫັນ ແລະ ປຶກສາຫາລື ກຳນົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ຕິດຕາມກວດກາ ການເຄື່ອນໄຫວວຽກງານ ພາຍໃນເຂດເຕັກໂນໂລຊີລະດັບສູງ ເພື່ອເຮັດໃຫ້ການດຳເນີນວຽກງານມີຄວາມສະດວກ, ວ່ອງໄວ, ຖືກຕ້ອງ ແລະ ໂປ່ງໃສ ແນ່ໃສ່ດຶງດູດ ແລະ ສົ່ງເສີມການລົງທຶນ ພາຍໃນ ແລະ ຕ່າງປະເທດ ຮັບປະກັນການເຊື່ອມໂຍງກັບພາກພື້ນ ແລະ ສາກົນ ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ. ໃນກອງປະຊຸມຜູ້ເຂົ້າຮ່ວມໄດ້ພ້ອມກັນປຶກສາຫາລື ແລກປ່ຽນຄຳຄິດຄຳເຫັນຢ່າງກົງໄປກົງມາ ແນໃສ່​ເພື່ອ​​ເຮັດໃຫ້​ຮ່າງ​ດຳລັດ​ສະບັບ​ນີ້ມີ​ເນື້ອ​ໃນສົມບູນ​ທີ່​ສຸດ​ ກ່ອນ​ຈະ​ນຳ​ສະ​ເໜີ​ເຂົ້າກອງປະຊຸມລັດຖະບານ ພິຈາລະນາຮັບຮອງເອົາໃນເດືອນໃນເດືອນ ຕຸລາ 2023 ນີ້. ຂຽນຂ່າວພຸດດາວອນ ------------------------------------ ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ເປີດການນຳໃຊ້ລະບົບບໍລິການພາກລັດປະຕູດຽວ(Gov-X) --------------------------------------- ໃນຕອນເຊົ້າຂອງ ວັນທີ 28 ສິງຫາ 2023, ກະຊວງເຕັກໂນໂລຊີ ແລະ ການສື່ສານ(ກຕສ) ຮ່ວມກັບ ອົງການສະຫະປະຊາຊາດເພື່ອການພັດທະນາ(UNDP) ປະຈຳ ສປປ ລາວ ຈັດພິທີເປີດການນຳໃຊ້ລະບົບບໍລິການພາກລັດປະຕູດຽວ(Gov-X) ທີ່ໂຮງແຮມ ຄຣາວ ພລາຊາ, ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ທ່ານ ອາລຸນໄຊ ສຸນນະລາດ, ລັດຖະມົນຕີປະຈຳສຳນັກງານນາຍົກ, ມີຄະນະຜູ້ບໍລິຫານຈາກອົງການ UNDP ປະຈຳ ສປປ ລາວ , ບັນດາຮອງລັດຖະມົນຕີ, ຕາງໜ້າຈາກບັນດາກະຊວງ, ສະຖານທູດ, ອົງການຈັດຕັ້ງສາກົນ, ບັນດາບໍລິສັດໂທລະຄົມ ແລະ ບໍລິສັດຜູ້ພັດທະນາລະບົບບໍລິການພາກລັດປະຕູດຽວ (Gov-X) ເຂົ້າຮ່ວມທັງໝົດ 130 ກວ່າທ່ານ. : ໃນໂອກາດດັ່ງກ່າວ, ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ກ່າວວ່າ: ປັດຈຸບັນ, ເຕັກໂນໂລຊີດິຈິຕອນ ມີການພັດທະນາຢ່າງກ້າວກະໂດດ ແລະ ໄດ້ກາຍເປັນເຄື່ອງມືທີ່ສຳຄັນໃຫ້ແກ່ການເຄື່ອນໄຫວ, ການດຳລົງຊີວິດຂອງມວນມະນຸດເຮົາ ໃຫ້ມີຄວາມສະດວກສະບາຍ ແລະ ເປັນປັດໃຈທີ່ສໍາຄັນໃຫ້ແກ່ ລັດຖະບານຂອງຫຼາຍປະເທດ ນຳໃຊ້ເຂົ້າໃນວຽກງານບໍລິຫານ ບໍລິການສັງຄົມ. ນອກຈາກນັ້ນ, ສປປ ລາວ ໄດ້ມີວິໄສທັດຫັນເປັນເສດຖະກິດດິຈິຕອນ ໄລຍະ 20ປີ (2021-2040), ແຜນຍຸດທະສາດເສດຖະກິດດິຈິຕອນ ໄລຍະ 10 ປີ (2021-2030) ແລະ ແຜນການຫັນເປັນເສດຖະກິດດິຈິຕອນ ໄລຍະ 5ປີ (2021-2025) ຊຶ່ງໄດ້ປະກອບມີ 3 ເສົາຄ້ຳຄື: ເສດຖະກິດດິຈິຕອນ, ສັງຄົມດິຈິຕອນ ແລະ ລັດຖະບານດິຈິຕອນ. ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la