ກອງປະຊຸມພົບປະບໍລິສັດ ແລະ ຜູ້ປະກອບກິດຈະການ ດ້ວຍຮູບແບບທຸລະກິດສະຕາດອັບ(Startup Meeting) -------------------------------- ໃນຕອນເຊົ້າຂອງ ວັນທີ 14 ສິງຫາ 2023, ສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງ ເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມພົບປະບໍລິສັດ ແລະ ຜູ້ປະກອບກິດຈະການ ດ້ວຍຮູບທຸລະກິດສະຕາດອັບ (Startup Meeting) ແນໃສ່ເພື່ອໃຫ້ຜູ້ເຂົ້າຮ່ວມໄດ້ຮັບຮູ້ ເຂົ້າໃຈ ກ່ຽວກັບ ທຸລະກິດ ສະຕາດອັບ ໃນ ສປປ ລາວ ແລະ ສາກົນ. ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ທ່ານ ນາງ ເກສອນ ສຸລິວົງ, ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ມີບັນດາ ກົມ/ທຽບເທົ່າ, ບັນດາບໍລິສັດ ຜູ້ປະກອບການທຸລະກິດ ສະຕາດອັບ ແລະ ພາກສ່ວນກ່ຽວຂ້ອງເຂົ້າຮ່ວມ 150 ກວ່າຄົນ. : ຈຸດປະສົງການໃນການຈັດກອງປະຊຸມຂອງກອງປະຊຸມຄັ້ງນີ້ ແມ່ນເພື່ອລິເລີ່ມໂຄສະນາປະຊາສຳພັນກ່ຽວກັບການກະກຽມການຈັດງານ Digital week ປະຈຳປີ 2023 ຊຶ່ງຄາດຄະເນວ່າຈະໄດ້ຈັດຂຶ້ນໃນລະຫວ່າງວັນທີ 10-14 ມັງກອນ 2024 ທີ່ຈະມາເຖິງນີ້ ທັງເປັນການປຶກສາຫາລືກ່ຽວກັບສິ່ງທ້າທາຍ ແລະ ຊອກຫາວິທີແກ້ໄຂຮ່ວມກັນ. ພ້ອມທັງຈະເປັນເວທີປຶກສາຫາລືຂອງການດຳເນີນກິດຈະການ ດ້ວຍຮູບແບບທຸລະກິດ ສະຕາດອັບ ຮ່ວມກັນ ລະຫວ່າງ ພາກລັດ ແລະ ບັນດາຜູ້ປະກອບກິດຈະການ ແລະ ການຈັບຄູ່ຮ່ວມມື ລະຫວ່າງ ຜູ້ປະກອບກິດຈະການດ້ວຍກັນເອງ ດ້ວຍຮູບແບບທຸລະກິດສະຕາດອັບ. ------------------------------------- ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la