ຊັບພະຄຸນໃນການດືມນ້ຳຊາ

ຮ່ວມມືເພື່ອສຶກສາວຽກງານການພັດທະນາລະບົບຢັ້ງຢືນຕົວຕົນດິຈິຕອນ ຢູ່ ສປປ ລາວ --------------------------------------------------- ໃນຕອນບ່າຍວັນທີ 1 ກັນຍາ 2023, ທີ່ ກະຊວງເຕັກໂນໂລຊີ ແລະ ການສື່ສານ, ສູນບໍລິຫານລັດດິຈິຕອນ ຮ່ວມກັບ ກະຊວງ ພາຍໃນ ແລະ ການສື່ສານ, ປະເທດ ຍີ່ປຸ່ນ ພ້ອມດ້ວຍບໍລິສັດ Ryobi System, ບໍລິສັດ NEC Corporation ໄດ້ຈັດກອງປະຊຸມຮ່ວມມື ເພື່ອສຶກສາວຽກງານການພັດທະນາລະບົບຢັ້ງຢືນຕົວຕົນດິຈິຕອນ ຢູ່ ສປປ ລາວ (Feasibility Study for Developing Digital ID in Lao PDR) ໂດຍການໃຫ້ກຽດເປັນປະທານຂອງ ທ່ານ ແກ້ວວິສຸກ ໂສລະພົມ, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ; ມີທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ, ທ່ານ Shinya SHIMADA, ຕາງໜ້າກະຊວງ ພາຍໃນ ແລະ ການສື່ສານ, ປະເທດ ຍີ່ປຸ່ນ ພ້ອມດ້ວຍຕາງໜ້າ ບໍລິສັດ Ryobi System, ບໍລິສັດ NEC Corporation ແລະ ພາກສ່ວນກ່ຽວຂ້ອງເຂົ້າຮ່ວມທັງໝົດ 25 ທ່ານ. : ຈຸດປະສົງຂອງງານກອງປະຊຸມຄັ້ງນີ້ ເພື່ອປຶກສາຫາລື ຮ່ວມກັນໃນການສ້າງກອບການຮ່ວມມື ເພື່ອສຶກສາຄວາມເປັນໄປໄດ້ໃນການພັດທະນາລະບົບຢັ້ງຢືນຕົວຕົນດິຈິຕອນ ຢູ່ ສປປ ລາວ ແລະ ເພື່ອແນະນຳແຕ່ລະພາກສ່ວນ ທີ່ມີບົດບາດສຳຄັນໃນການພັດທະນາລະບົບດັ່ງກ່າວ ຂອງສອງຝ່າຍ. ໃນກອງປະຊຸມ ໄດ້ນຳສະເໜີຄວາມເປັນມາຂອງແຜນຮ່ວມມືດ່ັງກ່າວ, ແຜນງານເບື້ອງຕົ້ນ ແລະ ແຜນການເຄື່ອນໄຫວຂອງການຮ່ວມມື, ຊຶ່ງຜູ້ເຂົ້າຮ່ວມປະຊຸມ ກໍ່ໄດ້ມີການປະກອບຄຳຄິດຄຳເຫັນ ເພື່ອຄວາມເປັນເອກະພາບ ແລະ ສ້າງຄວາມເປັນໄປໄດ້ໃນການຮ່ວມມືຄັ້ງນີ້. : ໃນຕອນທ້າຍຂອງກອງປະຊຸມ ທ່ານ ປະທານ ຍົກໃຫ້ເຫັນຄວາມສຳຄັນຂອງການພັດທະນາລະບົບຢັ້ງຢືນຕົວຕົນດິຈິຕອນ (Digital ID) ແລະ ໃຫ້ສືບຕໍ່ຮ່ວມກັນສອງຝ່າຍ ເພື່ອພັດທະນາລະບົບເຕັກໂນໂລຊີດິຈິຕອນໃນ ສປປ ລາວ ຕອບສະໜອງການຫັນເປັນດິຈີຕອນ ຕາມຍຸດທະສາດເສດຖະກິດດິຈິຕອນ ທີ່ລັດຖະບານໄດ້ປະກາດນຳໃຊ້. ພ້ອມກັນນັ້ນ, ກໍໃຫ້ທາງສູນບໍລິຫານລັດດິຈິຕອນ ປະສານສົມທົບກັບ ບໍລິສັດ Ryobi System, ບໍລິສັດ NEC Corporation ຄົ້ນຄວ້າທາງດ້ານນິຕິກຳ ແລະ ເຕັກນິກ ເພື່ອເຮັດໃຫ້ການຮ່ວມມືມີຄວາມເປັນເອກະພາບ ແລະ ເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າ. ----------------------------------- ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ສຳມະນາ ການສ້າງມາດຕະຖານເພື່ອແລກປ່ຽນຂໍ້ມູນຂ່າວສານກ່ຽວກັບການຄຸ້ມຄອງໄພພິບັດ ໃນຂົງເຂດປະເທດອາຊຽນ ---------------------------------------------- ສູນບໍລິຫານລັດດິຈິຕອນ, ກະຊວງ ເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມສຳມະນາກ່ຽວກັບ ການສ້າງມາດຕະຖານເພື່ອແລກປ່ຽນຂໍ້ມູນຂ່າວສານກ່ຽວກັບການຄຸ້ມຄອງໄພພິບັດ ໃນຂົງເຂດປະເທດອາຊຽນ (Establishment of the Standard to Exchange Data and Information Related to Disaster in the ASEAN Region ໃນລະຫວ່າງວັນທີ 30-31 ສິງຫາ 2023 ທີ່ ໂຮງແຮມ ແລນມາກ, ນະຄອນຫຼວງວຽງຈັນ ໂດຍການໃຫ້ກຽດເປັນປະທານຂອງ ທ່ານ ປອ ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ, ຊຶ່ງມີຜູ້ຕາງໜ້າຈາກບັນດາສະມາຊິກປະເທດອາຊຽນ, ຊ່ຽວຊານທີ່ປຶກສາຈາກ JTEC, ປະເທດຍິປຸ່ນ ແລະ ຕາງໜ້າຈາກ ສູນຊ່ວຍເຫຼືອຄຸ້ມຄອງໄພພິບັດອາຊຽນ AHA centre, ບັນດາກະຊວງ ແລະ ບັນດາກົມອ້ອມຂ້າງກະຊວງເຂົ້າຮ່ວມທັງໝົດຈໍານວນ 50 ທ່ານ. : ກອງ​ປະຊຸມ​ຄັ້ງ​ນີ້​ ເປັນໜຶ່ງໃນກິດຈະກໍາຂອງໜ່ວຍງານດິຈິຕອນອາຊຽນ ປະຈໍາປີ 2023(ASEAN Digital Workplan 2023) ທີ່ ສປປ ລາວ ເປັນເຈົ້າພາບ ໂດຍການ​ສະໜັບສະໜູນ​ຈາກກອງທຶນໄອຊີທີ ອາຊຽນ-ຍີ່ປຸ່ນ (ASEAN Japan ICT Fund) ​ເພື່ອສຶກສາບັນດາມາດຕະຖານຂໍ້ມູນ ແລະ ໝູນໃຊ້​ເຕັກ​ໂນ​ໂລຊີດິຈິຕອນເຂົ້າໃນວຽກງານຄຸ້ມຄອງ ແລະ ປະສານງານ, ການ​ແຈ້ງ​ເຕືອນ, ການ​ຄຸ້ມ​ຄອງ​ໄພພິບັດ ​ແລະ ​ແບ່ງປັນ​ບົດຮຽນ ແລະ ປະສົບ​ການ​ຂອງບັນດາປະເທດອາຊຽນ ​ແລະ ປະເທດຍີ່​ປຸ່ນ. ການສຶກສາໄດ້ອີງໃສ່ແຜນແມ່ບົດອາຊຽນໄອຊີທີດິຈິຕອນ 2025, ແຜນຍຸດທະສາດໄອຊີທີກ່ຽວກັບວຽກງານການຄຸ້ມຄອງໄພພິບັດ ປີ 2025 ​ ກອງປະຊຸມໄດ້ຮັບຟັງການລາຍງານຈາກ ປະເທດສະມາຊິກອາຊຽນ ກ່ຽວກັບ ສະພາບການພັດທະນາຂອງຕົນ ແລະ ປືກສາຫາລື ແນວທາງການສ້າງມາດຕະຖານຂອງການແລກປ່ຽນຂໍ້ມູນໄພພິບັດ ແລະ ຊ່ຽວຊານຈາກ ປະເທດ ຍິປຸ່ນ ໄດ້ນໍາສະເໜີຜົນການສຶກສາ ແລະ ວິເຄາະແບບສອບຖາມ ເບື້ອງຕົ້ນ ພ້ອມໄດ້ຍົກຕົວຢ່າງສະຖານະການປັດຈຸບັນຂອງລະບົບແຈ້ງເຕືອນໄພພິບັດທີ່ປະເທດຍິປຸ່ນ ແລະ ບັນດາສິ່ງທ້າທາຍທີ່ບັນດາປະເທດອາຊຽນ. ພ້ອມນັ້ນ, ຍັງໄດ້ຮັບຟັງບົດນຳສະເໜີ ຈາກຜູ້ຕາງໜ້າສູນ ASEAN Coordinating Center for Humanitarian Assistance on disaster management (AHA Center). ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ຄະນະນໍາ ກຕສ ເຂົ້າອວຍພອນວັນຊາດ ສສ ຫວຽດນາມ ຄົບຮອບ 78 ປີ --------------------------------- ຄະນະນຳກະຊວງເຕັກໂນໂລຊີ ແລະ ການສື່ສານ ຊຶ່ງນໍາໂດຍ ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີກະຊວງ ເຕັກໂນໂລຊີ ແລະ ການສື່ສານ(ກຕສ) ພ້ອມດ້ວຍຄະນະ ໄດ້ເຂົ້າອວຍພອນ ທ່ານ ຫງວຽນ ບ໋າ ຮຸ່ງ (Nguyen Ba Hung), ເອກອັກຄະລັດຖະທູດແຫ່ງ ສສ ຫວຽດນາມ ປະຈຳ ສ ປປ ລາວ ໃນວັນທີ 29 ສິງຫາ 2023 ທີ່ ສະຖານທູດ ສສ ຫວຽດນາມ ປະຈໍາ ສປປ ລາວ ເນື່ອງໃນໂອກາດວັນສຳຄັນຂອງຊາວຫວຽດນາມ ກໍຄື ວັນຊາດ ສສ ຫວຽດນາມ ຄົບຮອບ 78 ປີ (02/09/1945-02/09/2023). : ໃນໂອກາດດັ່ງກ່າວ, ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງກ່າວອວຍພອນເນື່ອງໃນໂອກາດ ວັນຊາດ ສສ ຫວຽດນາມ ຄົບຮອບ 78 ປີ. ພ້ອມນັ້ນ, ທ່ານຍັງໄດ້ກ່າວເຖີງມູນເຊື້ອສອງຊາດ ລາວ-ຫວຽດນາມ ແມ່ນມີຄວາມຮ່ວມມືກັນຢ່າງແໜ້ນແຟ້ນ ແລະ ຈິງໃຈເຫັນໄດ້ເຖິງຄວາມສຳຄັນ ຄວາມສາມັກຄີອ້າຍນ້ອງ ລາວ-ຫວຽດນາມ ທີ່ໃຫ້ການຊ່ວຍເຫຼືອ ແລະ ຮ່ວມມື ສະແດງອອກໃນການຈັດກິດຈະກຳໃນວັນສຳຄັນຕ່າງໆ ເຊັ່ນ: ການແຂ່ງຂັນບົດກະວີ, ປະກວດບົດເພງ ທີ່ກ່ຽວຂ້ອງກັບມິດຕະພາບລາວ-ຫວຽດນາມ ແລະ ອື່ນໆ. ພ້ອມນັ້ນ, ທ່ານຍັງໄດ້ລາຍງານໂດຍຫຍໍ້ສະພາບການພົວພັນຮ່ວມມື ລະຫວ່າງ ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ກະຊວງ ຖະແຫຼງຂ່າວ ແລະ ການສື່ສານ, ກະຊວງ ວິທະຍາສາດ ແລະ ເຕັກໂນໂລຊີ, ສະພາບັນດິດ ວິທະຍາສາດ ແລະ ເຕັກໂນໂລຊີ, ສສ ຫວຽດນາມ ພ້ອມທັງຈະສືບຕໍ່ຮັດແໜ້ນສາຍພົວພັນລະຫວ່າງສອງປະເທດຄວາມສາມັກຄີພິເສດ ລາວ-ຫວຽດນາມ ຊຶ່ງກະຊວງເຕັກໂນໂລຊີ ແລະ ການສື່ສານ ຈະຮັບເອົາຄຳສັ່ງສອນ ຂອງ ທ່ານ ໂຮ່ຈີມິນ, ທ່ານ ໄກສອນ ພົມວິຫານ ແລະ ທ່ານ ສຸພານຸວົງ ຜູ້ນຳທີ່ຍິ່ງໃຫຍ່ນຳໄປປະຕິບັດ ດ້ວຍຄວາມເຄົາລົບຮັກ. ຂຽນຂ່າວ ພຸດດາວອນ ພາສຸວັນ ------------------------------------ ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ກຕສ ຈັດພິທີມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022, ປະກາດການຈັດຕັ້ງ ແລະ ຫວນຄືນມູນເຊື້ອວັນສຳຄັນທາງປະຫວັດສາດສໍາຄັນຂອງຊາດ --------------------------------------------------- ໃນຕອນບ່າຍຂອງວັນທີ 30 ສິງຫາ 2023 ນີ້, ທີ່ຫ້ອງປະຊຸມໃຫຍ່ ກະຊວງເຕັກໂນໂລຊີ ແລະ ການສື່ສານ (ເຂດດອນຕິ້ວ) ໄດ້ມີພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ປະກາດການຈັດຕັ້ງ ແລະ ຮັບຊົມຮູບເງົາຫວນຄືນມູນເຊື້ອ 03 ວັນປະຫວັດສາດສໍາຄັນຂອງພັກ-ຂອງຊາດ ຄື: ວັນລັດຖະທໍາມະນູນແຫ່ງ ສປປ ລາວ ຄົບຮອບ 32 ປີ(15 ສິງຫາ 1991-15 ສິງຫາ 2023), ວັນຢຶດອໍານາດທົ່ວປະເທດ ຄົບຮອບ 78 ປີ(23 ສິງຫາ 1945-23 ສິງຫາ 2023) ແລະ ວັນສ້າງຕັ້ງອາຊຽນ ຄົບຮອບ 56 ປີ ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກຕສ, ມີບັນດາສະຫາຍຄະນະປະຈຳພັກ, ຄະນະພັກ, ຄະນະໜ່ວຍພັກ ບັນດາກົມ/ທຽບເທົ່າ, ຄະນະພັກຮາກຖານ ແລະ ບັນດາໜ່ວຍພັກບໍລິສັດອ້ອມຂ້າງກະຊວງ ພ້ອມດ້ວຍສະມາຊິກພັກ ຫຼັກແຫຼ່ງເຂົ້າຮ່ວມ.

ເປີດການນຳໃຊ້ລະບົບບໍລິການພາກລັດປະຕູດຽວ(Gov-X) --------------------------------------- ໃນຕອນເຊົ້າຂອງ ວັນທີ 28 ສິງຫາ 2023, ກະຊວງເຕັກໂນໂລຊີ ແລະ ການສື່ສານ(ກຕສ) ຮ່ວມກັບ ອົງການສະຫະປະຊາຊາດເພື່ອການພັດທະນາ(UNDP) ປະຈຳ ສປປ ລາວ ຈັດພິທີເປີດການນຳໃຊ້ລະບົບບໍລິການພາກລັດປະຕູດຽວ(Gov-X) ທີ່ໂຮງແຮມ ຄຣາວ ພລາຊາ, ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ທ່ານ ອາລຸນໄຊ ສຸນນະລາດ, ລັດຖະມົນຕີປະຈຳສຳນັກງານນາຍົກ, ມີຄະນະຜູ້ບໍລິຫານຈາກອົງການ UNDP ປະຈຳ ສປປ ລາວ , ບັນດາຮອງລັດຖະມົນຕີ, ຕາງໜ້າຈາກບັນດາກະຊວງ, ສະຖານທູດ, ອົງການຈັດຕັ້ງສາກົນ, ບັນດາບໍລິສັດໂທລະຄົມ ແລະ ບໍລິສັດຜູ້ພັດທະນາລະບົບບໍລິການພາກລັດປະຕູດຽວ (Gov-X) ເຂົ້າຮ່ວມທັງໝົດ 130 ກວ່າທ່ານ. : ໃນໂອກາດດັ່ງກ່າວ, ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ກ່າວວ່າ: ປັດຈຸບັນ, ເຕັກໂນໂລຊີດິຈິຕອນ ມີການພັດທະນາຢ່າງກ້າວກະໂດດ ແລະ ໄດ້ກາຍເປັນເຄື່ອງມືທີ່ສຳຄັນໃຫ້ແກ່ການເຄື່ອນໄຫວ, ການດຳລົງຊີວິດຂອງມວນມະນຸດເຮົາ ໃຫ້ມີຄວາມສະດວກສະບາຍ ແລະ ເປັນປັດໃຈທີ່ສໍາຄັນໃຫ້ແກ່ ລັດຖະບານຂອງຫຼາຍປະເທດ ນຳໃຊ້ເຂົ້າໃນວຽກງານບໍລິຫານ ບໍລິການສັງຄົມ. ນອກຈາກນັ້ນ, ສປປ ລາວ ໄດ້ມີວິໄສທັດຫັນເປັນເສດຖະກິດດິຈິຕອນ ໄລຍະ 20ປີ (2021-2040), ແຜນຍຸດທະສາດເສດຖະກິດດິຈິຕອນ ໄລຍະ 10 ປີ (2021-2030) ແລະ ແຜນການຫັນເປັນເສດຖະກິດດິຈິຕອນ ໄລຍະ 5ປີ (2021-2025) ຊຶ່ງໄດ້ປະກອບມີ 3 ເສົາຄ້ຳຄື: ເສດຖະກິດດິຈິຕອນ, ສັງຄົມດິຈິຕອນ ແລະ ລັດຖະບານດິຈິຕອນ. ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ທາບທາມຄຳເຫັນໃສ່ຮ່າງດຳລັດວ່າດ້ວຍເຂດເຕັກໂນໂລຊີລະດັບສູງ -------------------------------------------- ໃນວັນທີ 25 ສິງຫາ 2023 , ທີ່ຫ້ອງປະຊຸມໃຫຍ່ຊັ້ນ 05 ກະຊວງເຕັກໂນໂລຊີ ແລະ ການສື່ສານ (ເຂດສີສະເກດ), ກົມເຕັກໂນໂລຊີ ແລະ ນະວັດຕະກຳ ໄດ້ຈັດກອງປະຊຸມທາບທາມຄຳເຫັນໃສ່ ຮ່າງດຳລັດວ່າດ້ວຍເຂດເຕັກໂນໂລຊີລະດັບສູງ ໂດຍພາຍໃຕ້ການເປັນປະທານຂອງທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຕາງໜ້າຫ້ອງການ, ກົມ, ສະຖາບັນ, ສູນ ພາຍໃນກະຊວງ ແລະ ບັນດາກະຊວງອ້ອມຂ້າງ, ມີບັນດາຫົວໜ່ວຍທຸລະກິດ ແລະ ພະແນກ ວິທະຍາສາດ ແລະ ເຕັກໂນໂລຊີ ແຂວງ ຜ່ານລະບົບກອງປະຊຸມທາງໄກ. : ຈຸດປະສົງໃນການທາບທາມຄຳເຫັນຄັ້ງນີ້ ກໍເພື່ອແນໃສ່ການປະກອບຄຳເຫັນ ແລະ ປຶກສາຫາລື ກຳນົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ຕິດຕາມກວດກາ ການເຄື່ອນໄຫວວຽກງານ ພາຍໃນເຂດເຕັກໂນໂລຊີລະດັບສູງ ເພື່ອເຮັດໃຫ້ການດຳເນີນວຽກງານມີຄວາມສະດວກ, ວ່ອງໄວ, ຖືກຕ້ອງ ແລະ ໂປ່ງໃສ ແນ່ໃສ່ດຶງດູດ ແລະ ສົ່ງເສີມການລົງທຶນ ພາຍໃນ ແລະ ຕ່າງປະເທດ ຮັບປະກັນການເຊື່ອມໂຍງກັບພາກພື້ນ ແລະ ສາກົນ ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ. ໃນກອງປະຊຸມຜູ້ເຂົ້າຮ່ວມໄດ້ພ້ອມກັນປຶກສາຫາລື ແລກປ່ຽນຄຳຄິດຄຳເຫັນຢ່າງກົງໄປກົງມາ ແນໃສ່​ເພື່ອ​​ເຮັດໃຫ້​ຮ່າງ​ດຳລັດ​ສະບັບ​ນີ້ມີ​ເນື້ອ​ໃນສົມບູນ​ທີ່​ສຸດ​ ກ່ອນ​ຈະ​ນຳ​ສະ​ເໜີ​ເຂົ້າກອງປະຊຸມລັດຖະບານ ພິຈາລະນາຮັບຮອງເອົາໃນເດືອນໃນເດືອນ ຕຸລາ 2023 ນີ້. ຂຽນຂ່າວພຸດດາວອນ ------------------------------------ ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ລັດຖະມົນຕີ ກຕສ ຕ້ອນຮັບເຂົ້າຢ້ຽມຂໍ່ານັບຂອງ ເອກອັກຄະລັດຖະທູດ ສ. ອາເມລິກາ ປະຈໍາ ສປປ ລາວ --------------------------------------------------- ໃນຕອນບ່າຍຂອງວັນທີ 22 ສິງຫາ 2023 ນີ້, ທີ່ຫ້ອງຮັບແຂກ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ບັນດິດ ສຈ. ບໍ່ວຽງຄໍາ ວົງດາລາ ລັດຖະມົນຕີ ກຕສ ໄດ້ໃຫ້ກຽດຕ້ອນຮັບ ທ່ານ ປີເຕີ ເອັມເຮມ໋ອນ (Dr. Peter M. Haymond) ເອກອັກຄະລັດຖະທູດ ແຫ່ງສະຫະລັດອາເມຣິກາ ຜູ້ມີອໍານາດເຕັມ ປະຈໍາ ສປປ ລາວ ເຂົ້າຢ້ຽມຂໍ່ານັບອໍາລາໜ້າທີ່ ໃນໂອກາດທີ່ໄດ້ສໍາເລັດການປະຕິບັດໜ້າທີ່ທາງການທູດ ໃນ ສປປ ລາວ. : ໂອກາດດັ່ງກ່າວ, ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີ ທີ່ໄດ້ສະຫຼະເວລາ ອັນມີຄ່າ ຕ້ອນຮັບການເຂົ້າຢ້ຽມຂໍ່ານັບໃນຄັ້ງນີ້ຢ່າງອົບອຸ່ນ ແລະ ເປັນກັນເອງ. ພ້ອມນັ້ນ, ທ່ານຍັງໄດ້ລາຍງານໃຫ້ຊາບຂອບການຮ່ວມມືໃນລະຍະຜ່ານມາ ເປັນຕົ້ນແມ່ນ ຂອບຮ່ວມມືອາຊຽນ ແລະ ສອງຝ່າຍ: ສະພາທຸລະກິດອາເມຣິກາ-ອາຊຽນ ໄດ້ເຂົ້າພົບປະ, ປຶກສາຫາລື ຮ່ວມກັບຄະນະນໍາຂອງ ກຕສ ໂດຍແລກປ່ຽນທັດສະນະກ່ຽວກັບການສົ່ງເສີມການນໍາໃຊ້ເຄື່ອງມືດິຈິຕອນ ໃນໄລຍະການແຜ່ລະບາດຂອງພະຍາດໂຄວິດ-19 ແລະ ໃນໂອກາດ ທີ່ຄະນະນໍາ ກຕສ ເດີນທາງໄປເຂົ້າຮ່ວມກອງປະຊຸມລັດຖະມົນຕີອາຊຽນ ຄັ້ງທີ 3 ທີ່ປະເທດຟິລິປິນ ໃນຕົ້ນເດືອນກຸມພາ 2023 ຜ່ານມານີ້, ກໍໄດ້ມີການພົບປະສອງຝ່າຍລະຫວ່າງ ສປປ ລາວ ແລະ ສ. ອາເມຣິກາ ເພື່ອປຶກສາຫາລືແລກປ່ຽນກ່ຽວກັບຍຸດທະສາດ ແລະ ນະໂຍບາຍການພັດທະນາເສດຖະກິດດິຈິຕອນຂອງ ສປປ ລາວ, ບັນດານິຕິກໍາຕ່າງໆ ໂດຍສະເພາະແມ່ນ 14 ແຜນງານ ທີ່ນອນໃນແຜນພັດທະນາເສດຖະກິດດິຈິຕອນແຫ່ງຊາດ ໄລຍະ 05 ປີ (2021-2025). ນອກນີ້, ສປປ ລາວ ກໍຄື ກຕສ ຍັງໄດ້ຮັບການສະໜັບສະໜູນທຶນຝຶກອົບຮົມໄລຍະສັ້ນຫຼາຍຫົວຂໍ້ ເປັນຕົ້ນແມ່ນ: ຂົງເຂດວຽກງານໄອຊີທີ ແລະ ດ້ານຄວາມປອດໄພທາງໄຊເບີ. ພ້ອມດຽວກັນນີ້, ກໍໄດ້ປຶກສາຫາລືຂອບຂອງການຮ່ວມມືໃນຕໍ່ໜ້າ ເຊັ່ນ: ວຽກງານການພັດທະນາການນໍາໃຊ້ເຕັກໂນໂລຊີດິຈິຕອນທີ່ທັນສະໄໝ, ດ້ານການພັດທະນາຄວາມປອດໄພທາງໄຊເບີ ແລະ ການພັດທະນາບຸກຄະລາກອນ ໃຫ້ມີຄວາມຮູ້, ຄວາມສາມາດໃນການນໍາໃຊ້ເຄື່ອງມື ໄອຊີທີ ທີ່ທັນສະໄໝ ເຂົ້າໃນການປ້ອງກັນສື່ອອນລາຍ ຫຼື ການສໍ້ໂກງທາງອອນລາຍ ເພື່ອຫຼີກລ່ຽງຜົນກະທົບ, ບັນຫາ ແລະ ຄວາມທ້າທ້າຍທີ່ຈະເກີດຂຶ້ນໃນປັດຈຸບັນ.

ກອງປະຊຸມສະຫຼຸບການຈັດຕັ້ງປະຕິບັດ ຕິດຕາມກວດກາການສົ່ງເສີມການຂາຍ (Promotion) ຂອງ ຜູ້ໃຫ້ບໍລິການໂທລະຄົມມະນາຄົມ ແລະ ອິນເຕີເນັດ ------------------------------------------------------------------- ອົງການດັດສົມໂທລະຄົມມະນາຄົມ (ອດທ), ກະຊວງເຕັກໂນໂລຊີ ແລະ ການສື່ສານ (ກຕສ), ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດ ຕິດຕາມກວດກາການສົ່ງເສີມການຂາຍ ຫຼື ໂປຼໂມເຊິນ (Promotion) ປະຈໍາ 6 ເດືອນຕົ້ນປີ 2023 ແລະ ແຜນເຄື່ອນໄຫວ 6 ເດືອນທ້າຍປີ ປະຈຳປີ 2023 ຂຶ້ນໃນວັນທີ 22 ສິງຫາ 2023, ທີ່ຫ້ອງປະຊຸມ ຊັ້ນ 1 ຕຶກF ຂອງ ສະຖາບັນເຕັກໂນໂລຊີຂໍ້ມູນຂ່າວສານ ແລະ ການສື່ສານ. ໂດຍການເປັນປະທານຂອງ ທ່ານ ປອ. ນາງ ໃຈມາລີ ພະກະຊຸມ ຮອງຫົວໜ້າອົງການດັດສົມໂທລະຄົມມະນາຄົມ, ກຕສ ເຂົ້າຮ່ວມໃນກອງປະຊຸມຄັ້ງນີ້ປະກອບມີ ບັນດາກົມ/ທຽບເທົ່າພາຍໃນ ກຕສ ແລະ ຕາງໜ້າບັນດາບໍລິສັດຜູ້ໃຫ້ບໍລິການໂທລະຄົມມະນາຄົມ ແລະ ອິນເຕີເນັດເຂົ້າຮ່ວມ ຈຳນວນ 20 ກວ່າທ່ານ. : ຈຸດປະສົງຂອງການຈັດກອງປະຊຸມຄັ້ງນີ້, ແມ່ນເພື່ອສະຫຼຸບ ແລະ ລາຍງານສະພາບການຈັດຕັ້ງປະຕິບັດ ຕິດຕາມກວດກາໂປຼໂມເຊິນ ປະຈໍາ 6 ເດືອນຕົ້ນປີ 2023 ແລະ ແຜນເຄື່ອນໄຫວ 6 ເດືອນທ້າຍປີ ປະຈຳປີ 2023 ພະແນກດັດສົມໂທລະຄົມມະນາຄົມ ແລະ ອິນເຕີເນັດ, ການປັບປຸງນິຕິກຳ ການຄົ້ນຄວ້າກຳນົດໂຄງສ້າງລາຄາໃຫ້ບັນດາບໍລິສັດຜູ້ໃຫ້ບໍລິການໂທລະຄົມມະນາຄົມ ແລະ ອິນເຕີເນັດຊາບ. ພາຍໃນກອງປະຊຸມ ຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດການຈັດໂປຼໂມເຊິນ, ແພັກເກັດຕ່າງໆຜ່ານມາ, ສະເໜີຂໍ້ສະດວກ ແລະ ຂໍ້ຫຍຸ້ງຍາກ ໃນການໃຫ້ບໍລິການ, ການຂາຍ ແລະ ການຈັດໂປຼໂມເຊິນ ແລະ ບັນຫາອື່ນໆ ເພື່ອສະເໜີໃຫ້ ກຕສ ເປັນຂໍ້ມູນໃນການຄົ້ນຄວ້າປັບປຸງນິຕິກຳໃຫ້ສອດຄ່ອງກັບສະພາບການແຂ່ງຂັນທາງດ້ານໃນໂທລະຄົມມະນາຄົມ ເພື່ອຊ່ວຍໃຫ້ມີການບໍລິການທີ່ຫຼາກຫຼາຍ, ລາຄາເໝາະສົມ ຊຸກຍູ້ໃຫ້ປະຊາຊົນເຂົ້າເຖິງການບໍລິການທາງດ້ານດິຈິຕອນ ແລະ ເປັນການຜັນຂະຫຍາຍນະໂຍບາຍການຫັນເປັນດິຈິຕອນຂອງກະຊວງ. ບົດຂ່າວ: ພະແນກດັດສົມໂທລະຄົມມະນາຄົມ ແລະ ອິນເຕີເນັດ, ອດທ ------------------------------------ ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ກອງປະຊຸມປຶກສາຫາລືກ່ຽວກັບການພັດທະນາ ແລະ ຊຸກຍູ້-ສົ່ງເສີມການນຳໃຊ້ ລະບົບການຮຽນອອນລາຍແບບເປີດກວ້າງ (L-MOOCs) ----------------------------------------- ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມປຶກສາຫາລືກ່ຽວກັບການພັດທະນາ ແລະ ຊຸກຍູ້-ສົ່ງເສີມການນຳໃຊ້ ລະບົບການຮຽນອອນລາຍແບບເປີດກວ້າງ (L-MOOCs), ໃນຕອນບ່າຍຂອງວັນທີ 15 ສິງຫາ 2023 ຜ່ານມາ, ທີ່ຫ້ອງປະຊຸມຊັ້ນ 02 ຂອງກະຊວງ (ເຂດ ສນຍ), ໂດຍການເປັນປະທານຂອງ ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ພ້ອມດ້ວຍຄະນະສູນບໍລິຫານລັດດິຈິຕອນ, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ບໍລິສັດສະຕາໂທລະຄົມ (Unitel) ເຂົ້າຮ່ວມ ທັງໝົດຈຳນວນ 10 ກວ່າທ່ານ. : ກອງປະຊຸມໄດ້ປຶກສາຫາລືກ່ຽວກັບການພັດທະນາ ແລະ ຊຸກຍູ້-ສົ່ງເສີມການນຳໃຊ້ລະບົບຮຽນອອນລາຍແບບເປີດກວ້າງ (LMOOCs) ຊຶ່ງເປັນລະບົບທີ່ພັດທະນາຮ່ວມກັນ ລະຫວ່າງ ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ ໂດຍໄດ້ມີພິທີມອບຮັບຢ່າງເປັນທາງການໃນຄັ້ງວັນທີ 11 ມັງກອນ 2023 ທີ່ສູນອິນເຕີເນັດແຫ່ງຊາດ. ສູນບໍລິຫານລັດດິຈິຕອນ, ກຕສ ສປປ ລາວ ໄດ້ຮ່ວມກັບ ກົມຫັນເປັນດິຈິຕອນແຫ່ງຊາດ, ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ, ບໍລິສັດ ສະຕາໂທລະຄົມ (Unitel) ແລະ ບໍລິສັດໂທລະຄົມມະນາຄົມ ໂມບິໂຟນ (Mobifone) ສສ.ຫວຽດນາມ ໄດ້ສຳເລັດການຕິດຕັ້ງ ແລະ ໂອນຍ້າຍຂໍ້ມູນລະບົບການຮຽນອອນລາຍແບບເປີດກວ້າງ (L-MOOCs - Massive Open Online Courses) ມາໄວ້ຢູ່ຄຣາວຂອງ Unitel. ຈາກນັ້ນ, ກໍໄດ້ແຕ່ງຕັ້ງຄະນະຮັບຜິດຊອບ ໃນການພັດທະນາ ແລະ ຄຸ້ມຄອງລະບົບການຮຽນອອນລາຍແບບເປີດກວ້າງຂຶ້ນ, ພ້ອມກັບແບ່ງຄວາມຮັບຜິດຊອບພາຍໃນຄະນະຢ່າງຈະແຈ້ງ ໃນການຄຸ້ມຄອງ, ຊຶ່ປັດຈຸບັນ ເນື້ອໃນຂອງຫຼັກສູດປະກອບມີ 3 ໝວດວິຊາ ຄື: 1) ຫຼັກສູດການຫັນເປັນດິຈິຕອນ ເໝາະສຳລັບ ພະນັກງານຈາກຂະແໜງການ ແລະ ບັນດາວິສາຫະກິດ; 2) ຫຼັກສູດວິຊາສະເພາະ ເໝາະສໍາລັບຜູ້ບັນດາອົງການຈັດຕັ້ງສະເພາະ ຊຶ່ງມີເນື້ອໃນລົງເລິກ ຕາມຂົງເຂດທີ່ແຕກຕ່າງກັນ ເຊັ່ນ: ເສດຖະກິດ, ການສຶກສາ, ກະສິກໍາ, ສາທາລະນະສຸກ, ອື່ນໆ; ແລະ 3) ຫຼັກສູດກ່ຽວກັບທັກສະທົ່ວໄປ ເໝາະສໍາລັບປະຊາຊົນທຸກຄົນ ສາມາດເຂົ້າເຖິງເພື່ອຍົກສູງທັກສະຂອງຕົນ ເຊັ່ນ: ທັກສະທາງສັງຄົມ, ທຸລະກິດ, ການຄຸ້ມຄອງການເງິນ ແລະ ອື່ນໆ.