ບັດປະຈຳຕົວ ເປັນເອກະສານປະຈຳຕົວບຸກຄົນທີ່ສຳຄັນ ໂດຍບຸກຄົນຜູ້ມີສັນຊາດລາວທີ່ມີອາຍຸແຕ່ 18 ປີຂື້ນໄປ ຕ້ອງມີບັດປະຈຳຕົວເພື່ອມີໄວ້ໃຊ້ໃນການສະແດງຕົນຕ່າງໆ ເຊັ່ນ ການເຮັດທຸລະກຳ ການຂໍສະຫວັດດີການ ການໃຊ້ຍືນຍັນຕົວຕົນຕ່າງໆ . ບັດສະມາຊິກສະມາຄົມຄົນພິການແຫ່ງຊາດລາວ ແມ່ນບັດສຳລັບຢັ້ງການຂື້ນທະບຽນປະຫວັດບຸກຄົນ ເພື່ອໃຊ້ສຳລັບຢັ້ງຢືນຕົວຕົນ, ເພື່ອໃຊ້ປະກອບເອກະສານ ແລະ ເຄື່ອນໄຫວວຽກງານຕ່າງໆພາຍໃຕ້ກົດລະບຽບ, ນະໂຍບາຍຂອງສະມາຄົມ ແລະ ກົດໝາຍວ່າດ້ວຍຄົນພິການ. ບ່ອນອີງ: 1. ອີງຕາມ ດຳລັດ 238/ລບ, ລົງວັນທີ່ 11 ສິງຫາ 2017 ວ່າດ້ວຍສະມາຄົມ; 2. ອີງຕາມ ກົດໝາຍວ່າດ້ວຍຄົນພິການ ສະບັບເລກທີ່: 57/ສພຊ, ລົງວັນທີ່ 10 ທັນວາ 2018, ມາດຕາ 25 ສິດຂອງຄົນພິການ; 3. ອີງຕາມ ຂໍ້ຕົກລົງ ວ່າດ້ວຍການອະນຸມັດສ້າງຕັ້ງສະມາຄົມ ຄົນພິການແຫ່ງຊາດລາວ ເລກທີ່ 54/ພນ, ລົງວັນທີ່: 13 ກັນຍາ 2021; 4. ອີງຕາມ ແຜນພັກດທະນາ ເສດຖະກິດດິຈີຕອນ ແຫ່ງຊາດ ໄລຍະ 5 ປີ ຄັ້ງວັນທີ່ I (ປີ 2021 - 2025) 5. ອີງຕາມ ແຈ້ງການຂອງຫ້ອງການສະມາຄົມຄົນພິການແຫ່ງຊາດລາວ ເລກທີ່: ລົງວັນທີ່: 6. ອີງຕາມ ບົດບັນທຶກ ວ່າດ້ວຍການຮ່ວວມມື ແລະ ສະໜັບສະໜູນວຽກງານກ່ຽວກັບການໃຫ້ບໍລິການດິຈີຕອນໄອຊີທີແບບມີສ່ວນຮ່ວມ ແລະ ສ້າງຄວາມເຂັ້ມແຂງໃຫ້ແກ່ກຸ່ມສະມາຊິກຜູ້ພິການ ລະຫວ່າງ ບໍລິສັດວັນມີຣາໂຄ ແລະ ສະມາຄົມຄົນພິການແຫ່ງຊາດລາວ ຄັ້ງວັນທີ່: 25 ພະຈິກ 2022; 7. ອີງຕາມ ບົດບັນທຶກ ວ່າດ້ວຍຮ່ວມກັນສຶກສາ ແລະ ພັດທະນາແອບພີເຄຊັນ ລະບົບຖານຂໍ້ມູນສະມາຊິກ ສະມາຄົມຄົນພິການ ແຫ່ງຊາດລາວ ຄັ້ງວັນທີ່: 29 ທັນວາ 2022;

ຊຳເໜືອໃນ Version ກາຕູນ 😍 #PicVlog

ຊຳເໜືອໃນ Version ກາຕູນ 😍 #PicVlog

ປະກາດຂ່າວດີ📢📢📢 ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ຮັບນັກສຶກສາໃໝ່ ສົກສຶກສາ 2023-2024 ---------------------------------------------- ໂດຍອີງຕາມຂໍ້ຕົກລົງເລກທີ 1868/ກຕສ, ລົງວັນທີ 07 ກໍລະກົດ 2023 ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໄດ້ປະກາດຮັບນັກສຶກສາໃໝ່ ສົກສຶກສາ 2023-2024. ໂດຍເປີດໃຫ້ລົງທະບຽນ ຕັ້ງແຕ່ວັນທີ 09-23 ສິງຫາ 2023, ວັນທີ ສອບເສັງ 29 ສິງຫາ 2023. ທີ່ບ້ານວັດນາກ, ເມືອງສີສັດຕະນາກ, ນະຄອນຫຼວງວຽງຈັນ, Location:https://maps.app.goo.gl/y6CwzjScDerK9K6c7 ລົງທະບຽນອອນລາຍໄດ້ທີ່: https://iict.gov.la/ ສໍາລັບນ້ອງນັກສຶກສາທີ່ມາສອບເສັງ ເຂົ້າສະຖາບັນ ຕສ ໂດຍອີງຕາມການຮ່ວມມື ລະຫວ່າງສະຖາບັນ ຕສ ແລະ ບໍລິສັດຫົວເຫວີຍເຕັກໂນໂລຊີ (ລາວ) ຈໍາກັດ (Huawei Technologies (Lao) Sole Co., Ltd.) ແມ່ນຈະມີທຶນການສຶກສາ ໃຫ້ແກ່ນ້ອງນັກສຶກສາ ສໍາລັບຜູ້ທີ່ມີຄະແນນສອບເສັງສູງ ໃນອັນດັບທີ 1-5 ອີກດ້ວຍ. ນອກຈາກນີ້ ນັກສຶກສາທີ່ຮຽນຈົບຈາກ ສະຖາບັນ ທີ່ມີຄະແນນດີ ຍັງສາມາດຮຽນເຊື່ອມຕໍ່ຊັ້ນປະລິນຍາໂທ ທີ່ມະຫາວິທະຍາໄລ ວິທະຍາສາດ ແລະ ເຕັກໂນໂລຊີ, (University of Science and Technology) ຮ່າໂນ້ຍ, ສສ. ຫວຽດນາມ ເຊິ່ງເປັນ ມະຫາວິທະຍາໄລ ພາຍໄຕ້ການຮ່ວມມືລະຫວ່າງ ລັດຖະບານ ສສ. ຫວຽດນາມ ແລະ ລັດຖະບານຝຣັ່ງ.

ກອງປະຊຸມສໍາມະນາບົດບາດ ແລະ ຄວາມສໍາຄັນຂອງການນໍາໃຊ້ເຕັກໂນໂລຊີດິຈິຕ໋ອນ ໃນຍຸກອຸດສາຫະກໍາ 4.0 ------------------------------------------- ກົມເຕັກໂນໂລຊີດິຈິຕ໋ອນ (ກຕດ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມສໍາມະນາບົດບາດ ແລະ ຄວາມສໍາຄັນຂອງການນໍາໃຊ້ເຕັກໂນໂລຊີດິຈິຕ໋ອນ ໃນຍຸກອຸດສາຫະກໍາ 4.0 ຂຶ້ນໃນຕອນບ່າຍຂອງວັນທີ 15 ສິງຫາ 2023 ຜ່ານມານີ້, ທີ່ຫ້ອງປະຊູມ ຊັ້ນ 4 ຂອງ ກຕສ (ເຂດ ສນຍ) ໂດຍການເປັນປະທານຂອງ ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕ໋ອນ, ກຕສ, ມີຮອງຫົວໜ້າກົມ, ຜູ້ຕາງໜ້າຂອງບັນດາຂະແໜງການອ້ອມຂ້າງສູນກາງ, ສະພາອຸດສາຫະກໍາ ແລະ ການຄ້າ ພ້ອມດ້ວຍຄະນະຮັບຜິດຊອບ ເຂົ້າຮ່ວມ 60 ກວ່າທ່ານ. ຈຸດປະສົງໃນການຈັດກອງປະຊຸມສໍາມະນາຄັ້ງນີ້ ກໍເພື່ອປຶກສາຫາລືແລກປ່ຽນ ພ້ອມທັງເປັນການເຜີຍແຜ່ວຽກງານການຫັນເປັນທັນສະໄໝ ແລະ ການນໍາໃຊ້ເຕັກໂນໂລຊີດິຈິຕ໋ອນ ໃນຍຸກອຸດສາຫະກໍາ 4.0 ເຂົ້າຊ່ວຍ ໃນການຊຸກຍູ້ສົ່ງເສີມ ເຂົ້າໃນທຸກຂະແໜງການລັດ ແລະ ເອກະຊົນ ພ້ອມທັງເປັນການພັດທະນາຊັບພະຍາກອນມະນຸດ ດ້ານການນໍາໃຊ້ເຕັກໂນໂລຊີດິຈິຕ໋ອນ ໃນທົ່ວສັງຄົມ ເພື່ອຍົກສູງປະສິດທິພາບຂອງການຄຸ້ມຄອງບໍລິຫານລັດ ໃຫ້ມີຄວາມປອດໄພ ແລະ ເກີດຜົນປະໂຫຍດສູງສຸດ, ພ້ອມທັງເປັນການກັນຈັດຕັ້ງປະຕິບັດ ວິໄສທັດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 10 ປີ(2021-2030) ແລະ ແຜນພັດທະນາເສດຖະກິດດິຈິຕ໋ອນແຫ່ງຊາດ ໄລຍະ 5 ປິ (2021-2025) ໃຫ້ປະກົດເປັນຈິງ. ຂ່າວ: ກຕດ ພາບ: ທັດສະນີ ພົງບັນດິດ ------------------------------------ ອ່ານຂ່າວ ແລະ ຄົ້ນຫາຂໍ້ມູນກ່ຽວກັບ ກະຊວງເຕັກໂນໂລຊີ ແລະ ການສື່ສານ ໄດ້ທີ່: http://mtc.gov.la http://mtccabinet.gov.la

ກອງປະຊຸມປຶກສາຫາລື ຜ່ານຮ່າງແຜນແມ່ບົດລັດຖະບານດິຈິຕອນ ກັບ ຄູ່ຮ່ວມພັດທະນາ ແລະ ບັນດາບໍລິສັດຜຸ້ປະກອບການດ້ານໂທລະຄົມມະນາຄົມ ແລະ ໄອຊີທີ ສປປ ລາວ --------------------------------------------- ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ ຮ່ວມກັບ ອົງການສະຫະປະຊາຊາດ ເພື່ອການພັດທະນາ (UNDP) ໄດ້ຈັດກອງປະຊຸມປຶກສາຫາລື ຜ່ານຮ່າງແຜນແມ່ບົດລັດຖະບານດິຈິຕອນ (Digital Government Master Plan) ກັບ ຄູ່ຮ່ວມການພັດທະນາ ແລະ ບັນດາບໍລິສັດຜູ້ປະກອບການດ້ານໂທລະຄົມມະນາຄົມ ແລະ ໄອຊີທີ ຂອງ ສປປ ລາວ, ໃນວັນທີ 09 ແລະ 11 ສິງຫາ 2023 ທີ່ຜ່ານມານີ້, ທີ່ສໍານັກງານ ອົງການສະຫະປະຊາຊາດ, ນະຄອນຫຼວງວຽງຈັນ, ໂດຍການເປັນປະທານຮ່ວມຂອງ ທ່ານ ປອ. ທະວີສັກ ມະໂນທັມ ຫົວໜ້າສູນບໍລິຫານລັດດິຈິຕອນ ແລະ ທ່ານ ນາງ ມາຕີເນີ ເທເຣີ (Martine Therer) ຜູູ້ຕາງໜ້າຈາກ ອົງການສະຫະປະຊາຊາດ ເພື່ອການພັດທະນາ ປະຈໍາ ສປປ ລາວ, ມີຜູ້ເຂົ້າຮ່ວມຕາງໜ້າຈາກບັນດາອົງການຈັດຕັ້ງ ທັງພາຍໃນ ແລະ ສາກົນ ພ້ອມດ້ວຍບັນດາບໍລິສັດຜູ້ປະກອບການດ້ານໂທລະຄົມມະນາຄົມ ແລະ ໄອຊີທີ ຈຳນວນ 50 ກວ່າທ່ານ. : ກອງປະຊຸມປຶກສາຫາລືໃນຄັ້ງນີ້, ໄດ້ມີການນໍາສະເໜີໃຫ້ເຫັນເຖິງສະພາບການປັດຈຸບັນຂອງການບໍລິຫານ ແລະ ການບໍລິການລັດ, ສິ່ງທ້າທ້າຍໃນການຫັນເປັນລັດຖະບານດິຈິຕອນຂອງ ສປປ ລາວ ພ້ອມທັງ ຍົກໃຫ້ເຫັນເຖິງສະພາບແນວທາງການພັດທະນາ, ບັນດາຂໍ້ລິເລີ່ມ ແລະ ໂຄງການບູລິມະສິດ ໃນໄລຍະ 3-5 ປີຂ້າງໜ້າທ່ີໄດ້ກໍານົດໃນຮ່າງແຜນແມ່ບົດລັດຖະບານດິຈິຕອນ ເພື່ອຊ່ວຍໃນການຂັບເຄື່ອນ ແລະ ລິເລິ່ມ ການຫັນເປັນລັດຖະບານດິຈິຕອນຂອງ ສປປ ລາວ.

ກອງປະຊຸມຄົ້ນຄວ້າ, ຮັບຮອງລາຍວິຊາ ແລະ ໜ່ວຍກິດ ຫຼັກສູດປະລິນຍາຕີ 04 ສາຂາໃໝ່ ຂອງ ສຕສ -------------------------------------------- ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ສຕສ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມຄົ້ນຄວ້າ, ຮັບຮອງລາຍວິຊາ ແລະ ໜ່ວຍກິດ ຫຼັກສູດປະລິນຍາຕີ 04 ສາຂາໃໝ່ ຂອງສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ໂດຍການເປັນປະທານ ຂອງ ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ມີຕາງໜ້າບັນດາກົມທີ່ກ່ຽວຂ້ອງ, ພະນັກງານຜູ້ທີ່ມີວຸດທິລະດັບປະລິນຍາເອກພາຍໃນ ກຕສ ພ້ອມດ້ວຍຄະນະຮັບຜິດຊອບພັດທະນາຫຼັກສູດ ຂອງ ສະຖາບັນເຕັກໂນໂລຊີການສື່ສານຂ້ໍມູນຂ່າວສານ ເຂົ້າຮ່ວມທັງໝົດ 20 ກວ່າທ່ານ. : ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອເນັ້ນໃສ່ຄົ້ນຄວ້າ ແລະ ປະກອບຄຳເຫັນ ຕໍ່ກັບລາຍວິຊາທີ່ຈະບັນຈຸເຂົ້າໃນ 04 ຫຼັກສູດໃໝ່ ຂອງ ສຕສ ຄື: 1) ສາຂາເຕັກໂນໂລຊີລະດັບສູງ (AI), 2) ສາຂາການຄ້າທາງເອເລັກໂຕຣນິກ (E-Commerce), 3) ສາຂາໄປສະນີ ແລະ ໂລຈິສຕິກ ແລະ 4) ສາຂາຖານຂໍ້ມູນ ແລະ ບໍລິຫານເຊີເວີ. ທັງນີ້ກໍເພື່ອຮັບປະກັນໃນການພັດທະນາຫຼັກສູດໃຫ້ມີຄວາມທັນສະໄໝ, ຫຼາກຫຼາຍ ແລະ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງຕະຫຼາດແຮງງານ. ຊຶ່ງກອງປະຊຸມໄດ້ມີການປຶກສາການ ກຳນົດໜ່ວຍກິດຂອງແຕ່ລະລາຍວິຊາ ທັງ 04 ໝວດວິຊາ ໃຫ້ສອດຄ່ອງຕາມ ກະຊວງສຶກສາທິການ ແລະ ກິລາ ກຳນົດໄວ້ ແລະ ຈັດວາງລາຍວິຊາຂອງແຕ່ລະຫຼັກສູດລົງໃນແຕ່ລະພາກຮຽນ ເພື່ອໃຫ້ມີຄວາມຕໍ່ເນື່ອງ ສາມາດເຮັດໃຫ້ຜູ້ທີ່ຈະມາສຶກສາມີຄວາມຮູ້ທີ່ເກາະຕ່ອງ ແລະ ຕໍ່ເນື່ອງກັນ ເລີ່ມຕັ້້ງແຕ່ຂັ້ນພື້ນຖານຈົນຮອດຂັ້ນສູງສຸດ ເພື່ອສາມາດຈົບອອກໄປເປັນບຸກຄະລາກອນທີ່ມີຄວາມຮູ້ ຄວາມສາມາດອອກຮັບໃຊ້ສັງຄົມ.